Banal huboa'g bakus

CEBU, Philippines - Mibahad ang Canadian boxing sensation nga si Tyson 'The Prince of Hali' Cave nga dili lang ang pagpilde, kun dili iya usab nga pakauwawan si AJ 'Bazooka' Banal atubangan sa mga Pinoy boxing fans atol sa ilang sangka sa main event sa "Pinoy Pride 7: Battle at Mactan karong Hulyo 30 didto sa Hoops Dome sa Lapu-Lapu City.

"A flashy guy like me and a hard puncher like Banal this would be a great fight, but I’m confident in every fight and came to win," matud pa ni Cave atol sa press conference kagahapon didto sa Maya Mexican Restaurant sa   Banilad, ning siyudad.

Ang 29-anyos nga si Cave (15-1, 5KOs), nagkanayon nga wala siya manulong aron yanong pildihon sa Sugbuanong boksidor ug ang tuyo niya pag-anhi sa Sugbu dili lang ang paglangkat sa bakus ni Banal, apan lakip usab pagkabig sa ubang Filipino fans.

Si Cave mohagit ni Banal, ang WBO Asia Pacific bantamweight champion.

"If I’m done taking AJ’s little belt I will win some fans here and from there I’m probably thinking changing my name to Filipino Cave," matud pa ni Cave. 

Miangkon si Cave nga dili siya usa ka knockout puncher, apan gipasalig niya nga magkapuliki si Banal tungod sa talagsaon niyang estilo ug kaidlas ibabaw sa ring.

"I don’t knock people, I make them cry, I have fun with my opponent and I’m sure that after the fight he will hate me," dugang pa ni Cave.

Iya sab nga gipahinumduman si Banal nga dili na maghuna-huna sa iyang "rematch" ni Panamanian Rafael Concepcion kay siya mismo ang mobabag sa damgo niini nga rematch.

Si Robert Cave, ang amahan ug manedyer ni Tyson, nagtuo sab nga modaog ang iyang anak batok ni Banal.

Sa undercards, ang Indonesian fighters nga si Richard Samosir ug Eddy Camaro mipasalig sab nga mohimo og impresyon. Si Samosir makigharong ni Michael Domingo, samtang si Camaro nanganti nga iyang pildihon si Lorenzo Villanueva sa labing unang higayon.  - BANAT NEWS