CEBU, Philippines - Moabot na karong gabii dinhi sa Sugbu ang Canadian bantamweight champion Tyson 'The Prince of Hali' Cave aron mangandam alang sa iyang sangka batok ni ALA fighter AJ 'Bazooka' Banal karong Hulyo 30 didto sa Hoops Dome sa Lapu-Lapu City.
Si Cave mosuway pag-ilog sa Asia Pacific bantamweight title nga gihuptan ni Banal sa main event sa "Pinoy Pride 7: Battle at Mactan."
Si Tyson uban ang iyang amahan ug manager nga si Robert Cave sugaton sa mga representante sa ALA Promotions sa pagpangulo ni promotional head Chad Cañares.
Sa wala pa siya migikan paingon dinhi sa Sugbu, si Cave mibahad nang daan ngadto ni Banal nga mangandam alang sa dakung away.
"Tyson is going to win some fans in the Philippines and I would like to apologize in advance to the Filipino people for my boy Tyson will beat Banal," matud pa ni Robert Cave.
Ang 29-anyos nga si Cave nga adunay susama'g estilo ni heavyweight legend Muhammad Ali, adunay 15 ka daog, lima niini gikan sa knockout, samtang usa ang pilde. (BANATSPORTS)