Blue daog sa Yellow

CEBU, Philippines - Naka-eskapo ang Blue team bitbit ang 85-83 nga kadaugan batok sa Yellow sa nagpadayong 2nd Maj. Alfonso C. Abbariao Memorial Cup basketball tournament didto sa Benedicto College gym sa A.S. Fortuna, Mandaue City.

Sa laing duwa, gipakauwawan sa Green team ni Jingjing Rama ang Red pinaagi sa paglubong, 84-67 aron tapuson ang unang hugna sa eliminasyon uban ang 2-1 nga baraha.

Ang Blue team gipangulohan ni Chito Manahan pinaagi sa iyang 20 puntos. Ang higanteng sentro nga si Rizzan Herbito miamot og 15 puntos.

Sa labing unang higayon, ang District Collector sa Bureau of Customs (BOC) Port of Cebu nga si Atty. Ronnie Silvestre mi-iskor og sayes puntos nga maoy labing daku niyang natampo sa Blue team nga naghupot na karon og 2-1 nga baraha.

Mao kadto ang ikaduhang higayon nga nahiagom og sikit nga kapildihan ang Yellow nga gipangulohan ni Tata Laborte kinsa miposa og 25 puntos, apan bisan pa niana, wala gihapon kini niya maluwas ngadto sa pagtidlum sa 0-3 nga baraha.

Si Jojo Quinio midugang og 13 puntos, samtang tulo niya ka teammates ang mi-iskor sab og double figures.

Sa laing bahin, ang point guard nga si Wang-wang Gabica miburak og 30 puntos aron pangulohan ang Green team, samtang sila si Rama ug Noel Medalle nagkumboya og 40 puntos. Ang pilderong Red team gipangulohan sab ni Boodie Monteño sa iyang 20 puntos, gisundan ni Jan Mose nga adunay 15 puntos. (BANATSPORTS)