'Limbas' manalipod sa iyang rekord

CEBU, Philippines - Manalipod sa iyang walay tatsa nga rekord ang Sugbuanong si Renan 'Limbas' Noblefranca batok sa bisitang si Steve 'D Lightning' Sevilleno sa main event sa Yaw-Yan ArDigma Fighting Challenge V karong Agosto 6 diha sa Cebu Coliseum.

Ang garbo sa Yaw-Yan ArDigma nga si Noblefranca adunay 25 ka daog, usa niini ang iyang knockout nga kadaugan batok sa Muay Thai fighter nga si Jessie Tambiling sa URCC 6 didto sa Cebu International Convention Center (CICC).

Dili hinuon katiawtiawan ang pambato sa Cagayan de Oro City nga si Sevilleno kay aduna sab kini makapalisang nga rekord nga 21 ka daog, 12 niini gikan sa knockout, apan adunay upat ka pilde.

"Malingaw gyud ang manan-aw ani nga duwa, unya daghan pa usab og bouts, dili sila mabitin sa event, dili sila magmahay sa ilang ibayad," matud pa ni Yaw-Yan ArDigma founder Benigno 'Ekin' Caniga Jr.

Gawas sa kickboxing, aduna say Mixed Martial Arts category sa maong fight card nga magsilbeng qualifying event alang sa Ground and Pound 6 series.

Ang tiket nagkantidad og P300 sa ringside ug P150 sa lower box. Alang sa dugang mga detalye, mahimong motawag sa numero 09198215582 o 09324524999.  - BANAT NEWS