Cebu Niños, 3-0 na sa Super Leg

CEBU, Philippines - Mihipos sa ikatulo nilang sunod-sunod nga kadaugan ang defending champion M. Lhuillier Kwarta Padala-Cebu Ninos, dihang narimati ang host team Misamis Oriental (MisOr) Meteors, 69-63 sa miaging gabii sa SMC Liga Pilipinas Conference V Super Leg didto sa Xavier Gym sa Cagayan de Oro City.

Segurado na ang Cebu Niños sa Super Leg finals karong Domingo.

Ang Niños ni team owner Michel J. Lhuillier ug coach Raul Alcoseba nga naglaraw og "three-peat" championship mipahamtang og makatuok nga depensa ngadto sa Meteors hinungdan nga ang naulahi igo lang nihimo og 22-of-74 shooting.

Midala sa opensa sa Niños mao sila si Ariel Mepaña, Nat Cruz, Ian Saladaga ug Stephen Padilla. Si Mepaña maoy leading scorer sa iyang 22 puntos ug walo ka rebounds, samtang sila si Cruz, Padilla ug Saladaga mi-iskor og 10 puntos matag usa.

Nangulo sa Meteors mao si ex-PBA cager Egay Billones sa iyang 16 puntos, gisundan ni Ken Bono sa iyang nuybe puntos.

Sa sayo pa, nakabangon ang Laguna Golden Lions dihang ilang gilubong ang MP Warriors GenSan sa iskor nga 82-71.  (BANATSPORTS)