Red team nagsolo sa liderato sa Abbariao Cup
CEBU, Philippines - Mikulit sa ilang ikaduhang sunod-sunod nga daog ang defending champion Red team batok sa Blue, 74-68, aron magsolo sa liderato sa 2nd Maj. Alfonso C. Abbariao Memorial Cup basketball tournament niadtong Miyerkules sa gabii didto sa Benedicto College Gym sa dan A.S. Fortuna, dakbayan sa Mandaue.
Sa sayo pa, ang Green team nakabangon human mapilde sa una nilang duwa dihang ilang gipahimungtan ang Yellow sa iskor nga 94-80.
Si Jan Mose maoy topscorer sa Red pinaagi sa iyang 13 puntos, samtang si Customs Police Boodie Monteño ug si Chinchin Paghasian miamot og 12 puntos matag usa.
Si Chino Manahan mao sab ang nangu sa 1-1 nga Blue sa iyang 21 puntos.
Sa laing bahin, ang nabantog nga hardcourt sniper nga si Jingjing Rama mibalik na og duwa alang sa Green diin mibahog dayon kini og 29 puntos alang sa ilang 14 puntos nga kadaugan batok sa Yellow.
Gisuportahan sab si Rama ni Noel Medalle nga mitira og 15 puntos.
Si Tata Laborte mipabuto og 21 puntos alang sa Yellow nga nahiagom sa ikaduhang sunod-sunod nga pilde. (BANATSPORTS)
- Latest
- Trending
