Duke Frasco/CYBL Goodwill Games mosikad na didto sa Liloan Kai gym

CEBU, Philippines - Ang Liloan mao ang host sa nag-unang mga koponan sa CESAFI high school division sa ipahigayong Mayor Duke Frasco/Cebu Youth Basketball League (CYBL) Goodwill Games karong gabii didto sa Liloan Kai Gym.

Ang University of the Visayas (UV) Baby Lancers moharong sa Perfect Sports Outfit/P and H sa Liloan sa opener, samtang ang 5th district Congressional Cup Champion Liloan Under-18 All Stars makigbatok sa CESAFI 2010 champion Cebu Eastern College (CEC) Dragons sa main game.

Ang Sacred Heart School-Ateneo de Cebu (SHS-AdC) walay duwa karon ug ugma pa kini mopakita'g aksiyon niini nga goodwill games nga modagan sud sa duha ka weekends.

Magsilbe usab kini nga pagpangandam sa CESAFI teams alang sa CESAFI season, samtang ang Liloan nga moparada sa ilang koponan, kabahin usab sa ilang youth basketball program.

Mosubay kini og single round robin format diin ang top two teams magsangka sa kampiyonato.

Ang mga duwa gitakda sa Hulyo 15, 16, 17, 22, 23 ug 24.

"We’re excited that Mayor Frasco has agreed to work with us on this as this will surely give our town’s sports program a big boost," matud pa ni event organizer Bobby Motus.  (BANATSPORTS)