Lapu-Lapu Inter-barangay fun run gitakda

CEBU, Philippines - Sa tuyo nga dad-on ang running boom ngadto sa masa, ang kagamhanan sa dakbayan sa Lapu-Lapu mopahigayon sa labing unang Inter-barangay running series sa mga kabarangayan sa maong siyudad.

Ang lumba eksklusibo lamang sa mga residente sa dakbayan sa Lapu-Lapu, matud pa ni councilor ug sports commission chairman Harry Radaza.

Giulohan og "Health Run" ang lumba adunay siyam ka leg nga sugdan karong Agosto 6 diha sa Mactan Shrine ug tapuson sa Nobiyembre 19 diha sa Pusok Millenium Park ubos sa Marcelo Fernan Bridge.

Ang ubang leg schedules karong Agosto 27 gikan sa Ibo ngadto sa Buaya, Septiyembre 10 gikan sa Bangkal paingon sa Pajac, Septiyembre 24 gikan sa Maribago ngadto sa Agus, Oktobre 1 gikan sa Marigondon paingon sa Subasbas, Oktobre 22 gikan sa Gun-ob paingon sa Basak, Nobiyembre 5 gikan sa Babag paingon sa Canjulao ug Nobiyembre 12 gikan sa Poblacion paingon sa Looc.

Aduna kini registration fee nga P200 niadtong buot makaangkon og singlets ug member baller band. Ang mga sakop makahigayon sab sa pagdaog og mga ganti atol sa raffle draw.

Ang unang-duha ka legs naglatid sa 5K, 3K ug 1.5K, samtang ang third leg adunay 6K nga maoy longest race length.

Ang fourth ngadto sa six legs adunay 6.48K, 4K ug 2K, samtang ang mosunod nga duha ka legs adunay 8K, 6.48K ug 3K ug ang ninth leg adunay 10K, 6.48K ug 4K.  - BANAT NEWS