Finals na sa 1st Pagsabungan cagefest

CEBU, Philippines - Seguradong magsugwak ang katawhan nga mosaksi sa tinaktakay nga kampiyonato sa 1st Uswag Pagsabungan Sportsfest 2011 basketball tournament karong gabii didto sa   barangay Pagsabungan gym, dakbayan sa Mandaue.

Klaro na nga makaangkon og mga tropeyo ang Sector 2 nilang sector councilors Carlo Cotejo ug Ivie Vender tungod kay tulo nila ka teams ang nakalusot sa finals sa managlahing dibisyon.

Ang Sector 2 makigsangka sa Sector 7 nilang sector councilors Ismael Judilla ug Gabriel Tudtud alang sa SK/Juniors division title nga gikatakda sa alas-7 sa gabii.

Sa ikaduhang duwa, ang Sector 2 moduwa sab sa finals batok sa Sector 6 nilang councilors Roman Solon ug Ronel Surbano sa Lingkong (40-above) division.

Apan ang gikahinaman nga aksiyon, ang Sector 2 makigpinaksitay batok gihapon sa Sector 6 sa Seniors division.

Ang labing unang Pagsabungan Sportsfest hiniusang proyekto sa Pagsabungan Barangay Council ubos sa liderato ni Brgy. Capt. Andres Suson ug Sangguniang Kabataan nga gipangulohan sa ilang chairman Rey Judilla. (BANATSPORTS)