Wala'y first-day jitter alang kang Greg Slaughter

CEBU, Philippines - Usa na karon ka bonafide Ateneo Blue Eagle ug star player ang kanhi sentro sa University of the Visayas (UV) Green Lancers nga si Gregory Slaughter, ang 6-11 Fil-Am player kinsa mitabang sa Lancers aron modaog og tulo sa siyam ka korona sa Cebu Schools Athletic Foundation, Inc. (CESAFI) diin nahimo sab siya nga kanhi MVP.

Kagahapon, nakakita ako sa telebisyon sa labing unang duwa ni Slaughter sa Ateneo batok sa Adamson University Soaring Falcons ug si Slaughter maoy bayani sa ilang kadaogan 55-51 sa iyang debut sa 74th season sa Universities Athletic Association of the Philippines (UAAP) didto sa Araneta Coliseum.

Gipakita ni Slaughter ang iyang mga lihok sa dinhi pa siya sa CESAFI apan sa akong tan-aw, mas miumento ang iyang footwork samtang usa siya ka Blue Eagle ug dako’g exposure nga nahatag kaniya ang Fil-Oil pre-season game sa miaging buwan.

Sa first half pa lang daan, mi-iskor na si Slaughter og 12 puntos sa ilang halftime score nga 33-27. Tuod man, nahuman ang duwa nga si Slaughter maoy topscorer sa iyang 24 puntos, pito ka rebounds ug 2 ka blocks shots.

Kung dili lang malupig sa politika si Slaughter sa UAAP ilabi na kay una niyang season karon ug usa lang siya ka transferee didto, adunay dakong posibilidad nga siya maoy mahimong Rookie of the Year, kini kung permanente sab siya mopakita og labok. Bisan pa man tuod og dili sab yanong kontra ang Falcons (birds of prey sab sama sa Eagles), anha masukod ang iyang abilidad karong umaabot Sabado dihang ilang ikasangka ang De La Salle University (DLSU) Green Archers.

Ang Green maoy kanhi paboritong bulok o color ni Greg apan karon nga atua na siya sa Ateneo, asul o blue na sab ang iyang paboritong color. Usa na siya ka True-Blue Ateneo.

Sa akong tan-aw mahimong higpit nga karibal ni Slaughter alang sa ROY award mao mismo ang iyang teammate nga si Kiefer Ravena kinsa bisan og wala kaayo makapakita sa iyang abilidad kagahapon, mogawas gyud ang iyang natural nga duwa sa umaabot ilabi na kay suhito na siyang daan sa sistema sa Ateneo nga maoy iyang team sukad pa sa high school diin kanunay niyang gibaswat ang Blue Eaglets ngadto sa kampiyonato. Gani sa kataposan nga sila nahimong kampiyon sa miaging tuig nga mikulit sila’g four-peat, si Ravena man maoy juniors MVP.

Si Ravena, kanhi sakop sa RP Youth Team ug nahimo sab nga Jr. NBA MVP, anak ni kanhi PBA player nga si Ferdinand “Bong” Ravena nga nakaduwa sa San Miguel ug Purefoods.

* * *

Sa nalamgibit nga kalamboan sa basketball, bisan sa kaandam na sa 6-9 nga higante nga si Junemar Fajardo, ang sentro sa University of Cebu (UC) Webmasters kinsa gikatakdang moduwa sa Asian Basketball League (ABL), iya gyud gihapong tiwason ang iyang pagtuon sa kursong Hotel and Restaurant Management o HRM.

Matod pa sa team manager sa UC nga si Atty. Baldomero C. Estenzo, moduwa una si Fajardo sa CESAFI ug dili kini niya biyaan hangtod nga dili matapos ang torneyo sa Oktubre.

Si Fajardo ug Slaughter maoy nahimong inilang player sa tagsa-tagsa nila ka teams sa dihang nag-abot pa sila sa CESAFI.

Dugay na man ganing gipangulitawhan sa mga Manila teams kini si Fajardo apan wala gyud siya magpatintal sa mga tanyag o gitawag og “juicy offers” tungod kay loyal siya sa UC.

Karong Agosto 7 atol sa opening sa ika-11th season sa CESAFI, si Fajardo gihapon maoy paborito ug hayan siya lang gihapon maoy mobaswat sa UC kung mo-abante sila pag-usab sa finals.

Miscellaneous. Belated birthday greetings to my beautiful niece Abigail “Apple” Malagar last July 5.