Smart Gilas milubong sa Cebu Niños

CEBU, Philippines - Gipakita sa Smart Gilas Pilipinas nga hinog na sila sa ilang pagpangandamalang sa FIBA-Asia Championship human nila gilubong ang M. Lhuillier Kwarta Padala-Cebu Niños, 89-62 sa unang duwa sa Visayas-Mindanao tour sa miaging gabii diha sa Cebu Coliseum.

Bisan pa og nahimo kining one-sided game, nalingaw gihapon ang mga Cebuano basketball fans sa mga fancy plays ug mga dunks sa national team ilabi na ngadto ni Japeth Aguilar.

Ang 6-foot-9 nga si Aguilar mi-iskor og 10 puntos sa first half, lakip na ang upat ka break-away slam dunk nga maoy mihatag og 16 puntos nga labaw sa Gilas sa halftime, 42-26.

Nabuhi ang Niños sa third period human sa 11-2 run nila ni Stephen Padilla, Abby Santos ug Mark Jeffries aron pahakan ang labaw ngadto sa siyete puntos, 37-44.

Apan ang Gilas mi-outscored sa Niños sa katapusang kuwatro minutos sa pagpangulo nilang Chris Lutz, Dylan Ababou ug naturalized player Marcus Douthit aron inaton og balik ang labaw, 68-45.

Ang Gilas mirehistro sa labing daku nilang labaw nga puntos sa iskor nga 85-56 sa nahabiling dos minutos ug wala na kini molingi pa sukad niadto.

Si Lutz maoy topscorer sa Gilas sa iyang 17 puntos, gisundan ni Ababou nga adunay 14 puntos, samtang si Casio mihakot og 12 puntos.

Si Abby Santos mao lang ang bugtong player ang mi-iskor og double figure alang sa Niños pinaagi sa iyang 14 puntos, samtang si Mark Jeffries miamot og nuybe puntos. (BANATSPORTS)