Two Bridge Challenge gitakda sa Agosto 21

CEBU, Philippines - Nagpanikad na karon ang mga elite runners alang sa dakung lumba nga giulohang "Two Bridge Challenge" karong Agosto 21 diha sa Mandaue reclamation area.

Gipasiugdahan sa Cebu Doctors' University (CDU), ang lumba naglatid sa 21K half marathon ug 13K, 6K ug 3K alang sa mga beginners.

Kini ang labing unang higayon nga ang duha ka dagkung taytayan sa Sugbu nga Marcelo Fernan Bridge ug old Mactan Bridge gamiton sa 21K half marathon.

Kapin sa 3,000 ka mga runners ang gipaabot nga mosalmot sa lumba.

Tipik sa kitaon sa lumba itabang ngadto sa mga medical missions sa Run for Sight Foundation.

Ganting salapi ang madawat sa top five finishers sa matag dibisyon, samtang ang tanang finishers sa 21K ug 13K category makadawat og usa ka specially-designed medal.

Niadtong interesadong mosalmot, ang registration fee sa 6th CDU Run nagkantidad og P600 sa 21K, P450 sa 13K, P300 sa 6K ug P250 sa 3K. Mahimong magparehistro diha sa Center for Sight Foundation sa Cebu Doctors' Hospital ug Nike Athletic sa Banilad Town Centre (BTC).

Niños vs. Smart Gilas

Sa ikatulong higayon, magsinukdanay na sab sa ilang abilidad ang Smart Gilas-Team Pilipinas ug defending Liga Pilipinas champion M. Lhuillier Kwarta Padala-Cebu Niños sa usa ka exhibiton game karong alas-6 sa gabii diha sa Cebu Coliseum.

Unang nagkuros ang dalan sa duha niadtong Marso 5 sa miaging tuig diin midaog ang nasudnong koponan nga Smart Gilas sa iskor nga 83-71.

Nakabalos hinuon ang Cebu Niños   pagka-ugma niana sa iskor nga 79-76.

Apan ning higayona lahi nga aksiyon ang masaksihan tungod sa dakung kausaban sa line-up sa duha ka koponan.

Nakapabor ang Smart Gilas karon gumikan kay moduwa man ang ilang 6-foot-9 naturalized citizen nga si Marcus Douthit nga mao unya ang moguba sa duwa sa Cebu Niños

Ang Smart Gilas ni Serbian coach Rajko Toroman magsalig usab sa ilang lig-ong backcourt nga gipangulohan ni point guard   Chris Tiu uban nila ni JV Casio, Mark Barroca ug Marcio Lassiter. Moabag usab sila si Dylan Ababou, Jason Ballesteros, Japeth Aguilar ug Chriz Lutz.

Sa ilang bahin, ang Niños ni Michel Lhuillier ug coach Raul 'Yayoy' Alcoseba nga moduwang walay import mosandig sa ilang mga bag-ong recruits nga sila si ex-PBA player Ogie Menor, Allein Maliksi, Marvin Hayes ug Mark Jeffries.

Mosuporta usab sila si Ariel Mepaña, Stephen Padilla, Mark Abadia, Ferdinand Lusdoc ug Franklin Nailon.

Human sa Cebu Niños, ang Smart Gilas manulong sa three-time leg champion Mandaue RDAK Transports Cebu Landmasters ugma sa gabii didto sa Mandaue Cultural and Sports Complex.

Banal-Concepcion rematch

Daku'g purohan nga makab-ot ni ALA bantamweight prospect AJ 'Bazooka' Banal ang gidamgo niyang "rematch" uban   ni kanhi Panamanian world title challenger Rafael 'El Torito' Concepcion, ang bugtong boksidor nga nakapilde niya.

Tungod kay si Concepcion

miuyon na nga mobalik dinhi sa Pilipinas aron makigbinukbukay og balik ni Banal.

Ang posibilidad sa usa ka Banal-Concepcion rematch unang nahisgutan atol sa paglusad sa "Pinoy Pride 7: Battle of Mactan" boxing card, diin si Banal ang mobida sa main event batok ni Canadian Tyson Cave karong Hulyo 30 didto sa Hoops Dome sa Lapu-Lapu City.

Sa interview sa philboxing.com, ang 29-anyos nga si Concepcion nagmaya human madungog ang taho nga interesado ang ALA Promotions nga iparang siya pagbalik ngadto ni Banal.

Ang duha unang nagsangka niadtong Hulyo 2008 diha sa Cebu Coliseum, diin ang Panamanian midaog pinaagi sa usa ka makapakurat nga 10th-round knockout aron langkaton ang WBA interim flyweight title.

 "I am interested to go back to Cebu and to KO ALA’s pupil (Banal) again," matud pa ni Concepcion. "Our rematch might be done. For me no problem. Good luck to my amigo AJ in his coming fight. Let’s hope that his next fight is a rematch with me."

"We are looking for this fight, maybe a week from now we will start reaching out to the camp of Concepcion for planned rematch," matud pa ni ALA Promotions president Michael Aldeguer sa Banat News.

Hinuon giklaro ni Aldeguer nga kinahanglan una nga mo-pokus si Banal sa iyang away ni Cave ug makapakita og nindot nga away aron matuman ang rematch. (BANAT NEWS)