CEBU, Philippines - Pakyas si kanhi welterweight prospect Mark Melligen sa iyang tinguha dihang gi-TKO siya sa beteranong Argentinian fighter Sebastian Lujan kagahapon sa main event sa ESPN Friday Night Fight didto sa Freeman Coliseum sa San Antonio, Texas.
Sa taho sa boxingscene.com, si Lujan nga usa lang ka replacement boxer, mipatumba ni US-based ALA fighter Melligen sa makaupat ka higayon sa wala pa tapusa sa hingpit ang away sa oras nga 45 sa ikasiyam nga round.
Naglisud si Melligen sa maong away dihang gi-presyur kini ni Lujan, kinsa yano kaayong midabodabo sa Pinoy boxer.
Nakadisturbo sab sa away ni Melligen mao ang gisi sa iyang tuong kilay nga sayon ra kaayo ni Lujan sa pagpatama sa iyang mga kombinasyon.
Unang natumba si Melligen sa sixth round human maigo sa nagpungasi nga tuong kumo ni Lujan.
Bisan pa sa kaisog ni Melligen, nakita gyud ang kaluya niini hinungdan nga natumba na sab kini sa ikapito ug ikawalong round.
Sa ninth round, gibirahan og maayo ni Lujan si Melligen, kinsa wala na makabawos hinungdan nga giundang sa referee ang away. (BANATSPORTS)