Aldeguer nasurpresa

CEBU, Philippines - Giklaro sa ALA Promotions nga dili tinuod nga ang Mehikanong si Victor Proa maoy kontra ni AJ 'Bazooka' Banal sa "Pinoy Pride 7" karong Hulyo 30 didto sa Hoopsdome sa Lapu-Lapu City.

Sa gipadalang email, si ALA Promotions president Michael Aldeguer nasurpresa sa taho nga iyang nasiplatan sa laing lokal nga pamantalaan ug mga internet sites nga nag-ingon nga si Proa   maoy kontra ni Banal.

"I was surprised to read about the news regarding Banal fighting Proa. In fact, there was never any communication or negotiations with the Proa camp," matud pa ni Aldeguer.

Gitug-an ni Aldeguer nga karong adlawa, mahibaw-an na ang sunod nga kontra ni Banal atol sa paglusad sa "Pinoy Pride 7" didto sa Plantation Bay Resort and Spa sa Mactan Island.

Si Aldeguer mipadayag usab sa iyang kahinam tungod kay ang Pinoy Pride 7 mao ang labing unang sporting events nga molihi sa multi-million modern sports facility sa Lapu-Lapu City.

Si Banal, kinsa mosugal sa iyang WBO Asia Pacific bantamweight title, lab-as pa sa iyang impresibong second round demolition batok ni Tanzanian champion Francis Miyeyusho niadtong Marso 19 sa "Pinoy Pride 4" didto sa Waterfront Cebu City Hotel and Casino.  - BANAT NEWS