Mayweather gikasohan na sab
CEBU, Philippines - Lain na sab nga kaso ang atubangon ni undefeated Floyd Mayweather Jr., ning higayona gikan na sa iyang dumadapig, kinsa mipasangil nga gikulata sa bodyguard sa maong boksidor.
Gipasanginlan ni Anthony Cliff, 21 anyos, nga si Mayweather nga matud pa maoy misugo sa bodyguard sa pagkulata kaniya.
Si Cliff nga nakaangkon og bun-og, daling mitaho ngadto sa mga Las Vegas police human sa hitabo.
Gisaysay ni Cliff nga nahitabo ang insidente dihang iyang gikuhaan og hulagway si Mayweather nga bag-o lang migawas gikan sa usa ka casino sa Las Vegas.
Matud pa ni Cliff nga ang tinuod nga rason og nganong napungot si Mayweather ngadto kaniya mao ang iyang pagsukit-sukit kun kanus-a mahitabo ang away niini batok ni Manny Pacquiao.
Wala pa mihatag sa ilang habig si Mayweather, kinsa busy sa iyang pag-promote sa nagsingabot niining away batok ni Victor Ortiz karong Septiyembre 17 didto sa Las Vegas. (BANAT SPORTS)
- Latest
- Trending
