Peñalosa Jr. mo-KO ni Jimenez

CEBU, Philippines - Miabot na ang panahon ni super bantamweight prospect Dodie Boy Peñalosa Jr. nga ipakita ang nabatonan niyang abilidad nga mahimong world champion sama sa lakang sa iyang amahan ug uyoan sa dihang iyang sangkaon si Jeoffrey Jimenez sa Casablanca gym sa main event sa "Dugong Kampiyon" boxing card karong gabii diha sa Cebu Coliseum.

Dala ang ngalan sa iyang amahan nga si kanhi two-division world champion Dodie Boy Peñalosa Sr., ang batan-ong Peñalosa (4-0) mosuway pagkulit sa ikalima niyang sunod-sunod nga daog batok ni Jimenez (5-8-2, 3KOs) sa gikatakda nilang walo ka hugna nga binukbukay ibabaw sa ring.

Si Dodie Sr. una nang namahayag nga angay atngan ang away sa iyang anak tungod kay segurado siya nga usa na sab ka knockout ang himuon niini.

"Sa akong lang tan-aw ani, knockout gyud ni," matud sa amahan ni Peñalosa.

Sa iyang bahin, si Gerry Peñalosa miingon nga mahinungdanon ang maong away sa 20-anyos niya nga pag-umangkon tungod kay magsilbe kini nga tune-up fight sa dili pa kini isangka ni PBF super bantamweight king Jason Egera.

Sa supporting main event, si Marvin Mabait (12-0-2, 7KOs) sa Cong. Ernie Fabian’s Gym sa Manila moharong ni Aljun Salogaol (11-15-2, 5KOs) sa Omega Boxing Gym.

Duha ka amateur bouts ang mobukas sa fight card nga sugdan sa alas-4 sa hapon.

Ang mga tiket nagkantidad og P200 sa ringside, P100 sa lower box, samtang walay bayad   ang general admission kay giangkon kini ni  Manny Pacquiao. (BANAT NEWS)