CEBU, Philippines - Mipatigbabaw ang signal sa defending Comm Talk N’ Text Tropang Texters dihang ilang gilampornas ang Rain or Shine Elasto Painters, 120-108, aron pagsakmit sa unang dapit sa standing sa nagpadayung PBA Governor’s Cup kagabii didto sa Araneta Coliseum.
Subling gipakita sa Texters ang hugot nilang tinguha nga makab-ot ang ilang “three-peat” championship dihang dominante nilang gipaluhod ang Painters alang sa ikaduhang sunod-sunod nila nga daog.
Bisan pa og mas mubo itandi sa ubang import miwadwad gihapon si Maurice Baker kinsa maoy nangulo sa opensa sa Texters sa first half diin ilang gitukod ang 18 puntos nga labaw, 70-52.
Gikan didto, wala na gyud makasikit pa ang Painters nga nakahiagum sa labing una nilang pilde sud sa tulo ka duwa.
Mikiat usab ang mga local sa Texters sama nila ni Kelly Williams ug Jason Castro kinsa mimintinar sa ilang double-digit lead sa nahibiling 5:17 sa duwa, 109-94 aron iselyado ang daog.
Si Baker ug si Castro maoy bida alang sa Texters sa ilang 22 puntos matag usa, apan gawas sa puntos, mihimo usab og all-around play si Castro kinsa diriyot maka-triple-double sa iyang walo ka rebounds ug walo ka assists. (BANAT NEWS)