CEBU, Philippines - Midaog sa ikaduhang higayon ang Rama Boys Barkada ubos ni Cebu City Mayor Michael 'Mike' Rama ug ang McMill Enterprises batok sa tagsa-tagsa nila ka kaatbang sa Basketball Association of Ramos (BAR) 2011 First Conference didto sa Benjamin Solon Sports Complex sa Cogon-Ramos, ning siyudad.
Ang Rama Boys mipukan sa R.A. Essentials sa iskor nga 90-80, samtang ang McMill ni team owner Macky Hapitan milubong sa Alcohol, 101-67.
Sayong mi-arangkada ang Rama Boys sa pagpangulo ni Mayor Rama ug kanhi UV Lancer Rene Toring diin nakapundo kini og 13 puntos, 29-16 sa first period.
Mibawos ang R.A. Essentials ni skipper Reynolds Zamora ug milusad kini'g 32-19 nga rally aron makatabla, 48-all sa halftime.
Mikusog ang duwa sa R.A. Essentials sa final period diin mihimo sila’g 22-10 run aron moposte og 11 puntos nga bentaha, 69-58 sa tandem nilang Rocky Bacalso ug Zamora apan sa wala lang damha, misumbalik ang Rama Boys pinaagi sa ilang 32-11 run alang sa ilang kadaugan.
Si Toring maoy nangu sa Rama Boys nga miburak og 24 puntos, samtang si Mayor Rama mitira og 16 puntos, lakip na ang upat ka triples.
Ang R. A. Essentials gipangulohan nilang Bacalso ug Zamora nga nagkumboya og 37 puntos.
PUNTOS MATAG USA
Unang duwa:
RAMA BOYS (90) - Toring 24, Rama 16, Sumayang 15, Pinggoy 10, Ando 6, Bantolinao 6, Borres 4, Dela Cruz 3, Miller 2, Sabornido 2, Miranda 2
R.A. ESSENTIALS (80) - Bacalso 20, Zamora 17, Alcover 11, Dela Cruz 9, Sico 6, Capoy 5, Dela Calzada 4, Ang 4, Godiz 2, Endab 2
Ikaduhang duwa:
McMill (101) - Sillar 24, Gastador 20, Taboada 10, Arriola 9, Vocales 8, Hapitn 6, Ybañez 6, Dela Peña 6, Rosado 4, Rodriguez 4, Sebrero 4
Alcohol (67) - Colenares 19, Fuentes 15, Dytura 12, Villaceran 9, Yap 8, Aliñabon 4 (GGM)(BANAT NEWS)