Bag-ong Mandaue-Cebu Landmasters

CEBU, Philippines - Gumikan sa dakung kausaban sa ilang line-up, ang bag-ong Mandaue-Cebu Landmasters/RDAK makapakita na og maayong labok SMC-Liga Pilipinas.

Ang Landmasters nga unang nisalmot sa Liga Pilipinas atol sa Conference III niadtong   2009, wala pa makaabante sa quarterfinals sukad sa ilang pagsalmot sa liga. Apan sa gipalig-on nilang team, ang Landmasters nila ni Joe Soberano ug Recaredo Abella, Delfin King sa RDAK, kompiyansa nga mo-asenso ang ilang performance sa Liga Pilipinas.

Atol sa courtesy call didto sa Mandaue City Hall, si Mandaue City Mayor Jonas Cortez ug Vice-Mayor Glenn Bercede mipadayag sa ilang pagmaya tungod sa dakung kausaban sa ilang koponan.

Ang komposisyon sa Landmasters naglakip sa mga kanhi Cebu Niños cagers nga sila si Ariel Capuz, Mark Magsumbol, Hafer Mondragon ug managsuong Marlon ug Mario Basco. Anaa usab ang mga shooters sama nilang Axel Doruelo, Arnold Gabica Jr., Ryan Alicaway, Ariel Sta.Cruz, Leomer Losentes, Alfred Guerilla, Floyd Dedicatoria ug John Villaver, nga maoy bugtong player nga nahabilin gikan sa orihinal nga Landmasters.

Ang Landmasters mopakita sa una nilang labok ubos sa bag-ong line-up batok sa MisOr Meteors ugma sa opening sa Cebu leg sa Liga Pilipinas Conference V diha sa Cebu Coliseum.  (BANATSPORTS)