5th CESAFI Partners' Cup semifinals sugdan na karon

CEBU, Philippines -  Sugdan karon ang semifinal round sa 5th CESAFI Partners' Cup nga mosamot kamabulokon tungod sa pagsalmot sa UAAP team nga University of the Philippines (UP) Fighting Maroons diha sa USC main gym.

Ang UP Maroons moharong sa San Marino Corned Tuna sa alas-4 sa hapon, dayon sundan sa duwa tali sa Lion Tiger Aerosol ug sa Rose Aquarius Merchandising sa alas-5:30 sa hapon.

Ang topseed Gaisano Capital nga nagtabla uban sa Lion Tiger sa  managsamang 10-2 win-loss records human sa double round eliminations, walay duwa karon ug ilang tilawan ang San Marino ugma sa main game sa laing double-header.

Pormal nga nasakmit   sa Gaisano Capital ang unang puwesto human ilang gipukan ang San Marino paghuman sa eliminasyon niadtong Biyernes sa iskor, 88-81.

Sa samang paagi, ang San Marino nagtabla sab uban sa Rose Aquarius, apan naangkon ang ikatulong puwesto human sa elimination pinaagi sab sa tiebreaker.

Ang Fighting Maroons mosalmot sa CESAFI squads nga kabahin sa ilang pagpangandam alang sa umaabot nga UAAP season karong Hulyo.

Sa laing bahin, nasakmit pagbalik sa Gaisano Capital ang unang dapit human moburak og 29 puntos ang 6-foot-9 nga si Junemar Fajardo, apan ang labing daku’g natabang mao ang offguard nga si Roger Caytuna, kinsan miamot og 16 puntos.

Si Eleazar Armecin maoy nangu sa San Marino nga adunay 17 puntos, gisundan nilang Bonifacio Guillena ug Rene Pacquiao nga adunay 16 ug 14 puntos matag usa.

Sa sayo pa, ang Winner Beef Loaf mitapos sa elimination pinaagi sa pagpukan sa Prime Asia Pawnshop, 97-91 sa overtime sa usa ka non-bearing game. Ang Winner mitapos sa elimination sa ilang 3-9 nga baraha samtang ang Prime Asia adunay 4-8 nga baraha.  (BANATSPORTS)