3 Pinoy na lang ang natitira

Manila, Philippines - Patuloy ang paghaha­ngad nina Dennis Orcollo, Carlo Biado at Lee Van Cor­teza sa kampeonato sa World Ten Ball Championships nang umukit ang mga ito ng panalo sa Last 32 ka­hapon sa World Trade Center sa Pasay City.

Pinawi ni Orcollo ang 4-7 iskor at kinapitalisa ang naisablay na one-ball ni Karl Boyes ng Great Britain para sa 9-7 panalo.

Gumuho na ang laro ni Boyes dahil sumablay din siya sa 1-10 kombinasyon at nag-scratch pa sa 14th rack upang maitabla ng World 8-Ball champion ang labanan sa 7-7.

Sablay uli si Boyes, da­ting World 8-ball champion, sa 2-7 combo sa 15th rack upang makatikim ng kala­mangan sa unang pagka­kataon si Orcollo bago tinapos ang laban sa 16th rack na kinatampukan ng pabandang tira sa 3-ball.

Si Biado naman ay di­no­mina ang kababayang si Ronnie Alcano sa 9-1 iskor habang si Corteza ay pinagpahinga na si Han Hao Xiang ng China, 9-4.

Minalas naman si Jundel Mazon sa laro nila ni Park Shin Yong ng Korea nang makawala pa ang 8-7 kalamangan para lasapin ang 9-8 masakit na kabiguan.

Dahil dito, tatlong Pinoy na lamang ang sasandalan papasok sa Last 16 na kung saan kalaro ni Orcollo si Wu Jiaqing ng China; si Biado ay masusukat kay Daryl Peach ng Great Britain at si Corteza ay masusubok kay Li Hewen ng China.

Si Wu, na dating pamba­tong manlalaro ng Chinese Taipei bago lumipat ng China ay nanalo kay Li Wen Lo ng Japan, 9-8; si Peach ay lumusot kay Shane Van Boening ng US, 9-6; at si Li ay nangibabaw kay Nick Van Den Berg ng Netherlands, 9-6.

Wala na rin sa labanan para sa titulo si dating World 9-ball champion Darren Ap­pleton nang masilat siya kay Tamoo Takano ng Japan, 9-5.

Gaya ng Pilipinas, ang China ay mayroong tatlong manlalarong buhay pa habang dalawa naman ang sa Japan.