CEBU, Philippines - Yano kaayong gilubong sa Rose Aquarius Merchandising ang Prime Asia Pawnshop, 69-49 alang sa ikaupat nilang sunod-sunod nga daog sa 5th CESAFI Partners' Cup kagabii didto sa Cebu Coliseum.
Samtang ning pagsuwat, padayon pang nagsangka ang Gaisano Capital (8-1) ug ang Ave Maria Sanctuary Park (4-6).
Ang Rose Aquarius walay kukaluoy nga milatos sa Prime Asia sa third period ug gipahamtangan pa kini og 20 puntos nga lubong sa final period.
Ang Rose Aquarius miposte’g 16-6 nga abante sa first quarter, ug sa mga paningkamot sa Prime Asia nakan-an ang labaw sa halftime, 29-21.
Wala na makasugakod ang Prime Asia sa second half tungod kay misamot ka-balanse ang opensa sa Rose Aquarius uban ang solidong depensa.
Si Earvin Ferraren maoy nangu sa Rose Aquarius pinaagi sa iyang 12 puntos, napulo niini gikan sa second period, samtang si Fritz Dajalos miabuno og 11 puntos.
Mao kadto ang ikaupat nga winning streak sa Rose Aquarius, kinsa nagtinguhang mo-abante sa semifinals. Apan bug-at ang ilang tahas karong Huwebes kay ilang ikasangka ang Gaisano Capital nga gipangulohan sa 6-foot-9 Junemar Fajardo.
Sila si Giovanni Padillo ug Sam Hermosa maoy nangu sa Prime Asia nga nagkumboya og 21 puntos.
PUNTOS MATAG USA
Rose Aquarius (69) - E. Ferraren 12, Dajalos 11, Sedurifa 8, J. Ferraren 8, Avila 6, Meca 6, Nudalo 5, Maraño 4, Linao 4, Cabahug 2, Sollano 2, Fuentes 2, Genobia 1
Prime Asia (46) - Padillo 11, Hermosa 10, Magat 6, Cantonao 6, Reyes 3, Codilla 2, Duran 2, Cortes 2, Bautista 2, Otida 2 (BANATNEWS)