CEBU, Philippines - Dugay nang nakahibalo ang mga boxing fans nga hisawpan na sa iyang adlaw kining itom pa sa takuling sa kaldero nga si Shame (Shane) Mosley nga nagsige og pagarpar nga iya gyud kunong knock-out ton si Manny Pacquiao ug kung mahimo usa kuno ka “quick” knockout. Motuo na unta ako ilabi na kung nagbitbit pa siya’g puspos apan tungod kay kumo may iyang gigamit, pwerteng pagka-unay ni Mosley sa iyang tari. Kung sa termino pa sa mga “sabungero” bawbaw sa tuo.
Nagsaulog na sab ang mga Pinoy sa kadaogan ni Pacman kagahapon pinaagi sa usa ka 12th round unanimous decision batok kang Mosley sa ilang WBO world welterwieght title fight diin nadepensaan sa atong Pambansang Kamao ang korona didto sa MGM Grand Garden sa Las Vegas, Nevada. Sama sa gihapon, wala gihapo’y makalupig sa atong boxing icon isip pound for pound king.
Sa layo pa ang ilang away, kumpyansa kaayo si Shame nga iyang tumbahon si Pacman samtang ang ubang boksidor nagtuon pa hangotd karong mga panahona kung unsaon pag-igo si Pacman aron makatilaw gyud og lucky punch. Ang uban midangop na’g science aron estudyohan ang istelo ni Pacman samtang ang uban nag-estudyo sab kung unsaon pagtumba ni Pacman pinaagi lang sa laway. Dili ni negosyo Shame nga puede “sales talk” gamiton ug sili sab ka albularyo nga laway maoy makapukan kang Pacquiao.
Mahitabo kuno ang dinaliang knockout kay matod pa ni Shame makasugakod siya sa gikusgon sa kinumo ni Pacman ug tuod man may sayo gyud nga natumba.... sa ikatulong round pa lang may natumba na apan si Shame maoy nahapla.
Human sa iyang pagkatumba sa ikatulong round, nagpanagana nag buhi sa iyang kinumo si Shame ug nagkapuliki na siya’g tabon sa iyang nawong aron dili kini mahimong punching bag. Tataw kaayong gidominar ni Pacman ang duwa ug mas daghan sa atong kaigsoonan dinhi sa Sugbo ang nag-ingon nga wala sila malingaw sa maong away. Mas nalingaw pa sila sa away ni Pacman ug Joshua Clottey dihang gidapog ni Pacman ang duha ka dunggan ni Clottey tungod kay magsige lang kini’g tabon sa iyang dunggan diin mao kini iyang gigamit isip head protector.
Diriyot gyud unta makapanghambug si Shame dihang nalukapa si Pacman sa ika-napulong round ug nagtuo si Mosley nga natumba si Pacman kay naigo sa iyang kumo apan ang tinuod diay, iya kining gitukmod. Nakuratan intawon si Pacman nganong dali kaayong naka-ihap ang referee nga si Kenny Bayless nga unta dali man siyang mibarug.
Ang maong kadaogan naghatag kang Pacman ug 54-3-2 nga record samtang si Shame adunay 46-7-1. Ang tulo ka judges nga mipabor kang Pacman mi-iskor sa duwa pinaagi sa 120-108, 120-107 ug 119-108.
Gi-boo si Shame sa may gibana-banang 16,412 ka boxing fans didto sa MGM Grand tungod kay panagsa na lang siya manukmag. Misamot kadaghan ang text joke kalabot sa mga pagarpar ni Shame tungod kay wala gyud magsilbe ang iyang gipanganti. Hinoon, ang nahitabo karon, ang mga Americans are A-shamed Mostly.
Duna sab ko’y text joke nga nadawat gikan sa akong higala nga si Eric Labrada nga nagkutlo kunohay sa ilang dialogue ni Mosley ug Mommy Dionisia kinsa magsaulog sa iyang adlaw’ng natawhan unya sa sunod Domingo, Mayo 15. Mao kini ang unod sa text joke... Shame Mosley “I can knock Pacquiao out with one punch!” ug mitubag si Mommy Dionisia “Shane on you! Everything you say about my son are Mosley lies!.
Miscellaneous. Belated Mother’s Day to all. My son Matt Erikson will turn 17 this coming Saturday, May 14. We were like holding a reunion last May 4 when we observed the 14th death anniversary of my mother Flordelina who died on May 4, 1997 and is buried at the Minglanilla Sanctuary Park. The SPORTSgab wants to condole the family of University of Cebu (UC) College of Law Dean Atty.Baldomero C. Estenzo for the death of her mother Soccoro Cortes Estenzo at the age of 92. She was interred last Friday, May 7. Thanks to USPF coach Raul Latonio, Sr. for the pay-per-view facilities and his luxury service during the Pacquiao-Mosley fight at his plush residence at Sunny Hills Subdivision in Talamban where you can experience fresh air and a panoramic view overlooking most parts of the city. - BANAT NEWS