Dajalos maoy bayani sa Rose Aquarius

CEBU, Philippines - Ang walhon nga si Fritz Dajalos maoy misalbar sa Rose Aquarius Merchandising dihang nakapasulod siya’g usa ka perimeter jumper sa nahibiling 19 segundos aron mo-iskor og kulba-hinam nga 68-67 nga kadaogan batok sa mas paboritong Ave Maria Sanctuary Park ug pabiling buhi sa ilang kampanya sa semifinals sa nagpadayong 5th CESAFI Partner’s Cup niadtong Sabado sa Cebu Coliseum.

Sa sayo pa, ang solo leader nga Gaisano Capital naglisod pagkulit og 62-69 nga kadaogan batok sa Winner Beef Loaf kinsa diriyot mokulit og upset.

Nabiyaan unta ang Rose Aquarius og nuybe puntos pagsugod sa third period, 36-45 apan hinay-hinay silang mikamang sa unahan hangtod nailog nila ang labaw human sa third period, 54-52.

Dali sab hinoong milabaw og usab ang Ave Maria didto sa fourth period diin miposte sila’g 62-56 nga abante sa kataposang sayis minutos sa duwa apan gi-apas sab gihapon kini sa Rose Aquarius ginamit ang 6-0 run aron tablahon ang duwa sa 62-all, may 3:06 ang nahibiling oras.

Ang Ave Maria gihapon ang nag-una, 65-62 human sa three-point ni Banjo Capillar ug milabaw og kuwatro puntos human sa basket ni Jason Olbedado, 67-63 sa kataposang minuto sa duwa.

Ang three-pointer ni Joseph Sedurifa maoy mipasilit sa Rose Aquarius, 66-67 may 53 segundos ug dayon nakahimo’g turn over si Jason Nudalo sa Ave Maria ug naka-iskor si Dajalos sa iyang winning basket sa kataposang 19 segundos.

Mao kadto’y ikatulong sagunson nga daog sa Rose, ang ikatulong labing taas nga lanat sa maong torneyo human sa 7-0 run sa Gaisano ug 5-0 run sa Lion Tiger.

Si Dajalos maoy nangu sa Rose Aquarius sa iyang 17 puntos ug si James Ferraren midugang og 17 puntos samtang miposa sab og 17 puntos ang 6'9 nga si Junemar Fajardo arong pangulohan ang Gaisano.

Puntos matag usa:

First Game:

Gaisano Capital (62)— Fajardo 17, Pogoy 12, Batua 11, Bercede 9, Mohammad 3, Aranas 2, Labolabo 2, Miranda 2

Winner Beef Loaf (59)— Curso 16, A. Nazareno 8, Dimco 6, Casto 6, Batiquin 5, Booc 4, Felisario 4, Taboada 4, D. Nazareno 2, Infante 2, Sanchez 2

Second Game:

Rose Aquarius (68)— Dajalos 17, J. Ferraren 12, Sedurifa 7, E. Ferraren 6, Araño 5, Meca 4, Cabahug 4, Sollano 4, Avila 3, Nudalo 3, Linao 2, Genobia 1

Ave Maria (67)— Abing 15, Dela Rama 12, Olbedado 11, Capillar 11, C. Parker 4, Genodiala 3, Tabaloc 3, Nudalo 3, Suliman 2, Palileo 1, M. Parker 1, Cinco 1.  - BANAT NEWS