CEBU, Philippines - Kasinatian maoy gihimong hinagiban sa Team X-Men pagpukan sa University of San Carlos (USC) Spiking Warriors sud sa straight sets aron moabante sa championship sa 1st Niño Rabaya Cup volleyball tournament didto sa Talisay City gym.
Mangtas kaayo ang Spiking Warriors sa tibuok duwa, apan ang X-Men spikers yano kaayong misagang sa mga opensa sa kontra aron moposte og daog, 25-22. 25-22, 25-23.
Ang trayanggulo sa PHL beach volley member Jonrey Sasing, Roderick Arenasa ug Jesriel Pino maoy mitimon sa X-Men ubos ni Norvie Labuga, uban nilang Joselito Moncada ug Roel Lato.
Sa maong kadaugan, ang X-Men nakadawat og P8,000 ug ingon man tropeyo ug mga medalya.
Samtang ang USC mibulsa og P6,000, samtang ang Dindo Salon Xclusivz nakadawat og P4,000 sa ilang pagpahiluna sa ikatulo nga dapit. (BANATSPORTS)