CEBU, Philippines - Nabaraw sa Hoopers nga gipangulohan ni Yoli Meso ang tulo ka sunod-sunod nga daog sa league-pacesetter CUBA-B pinaagi sa pagkulit og 75-66 nga kadaugan sa elimination round sa 2011 Cebu United Bankers Association (CUBA) summer basketball tournament didto sa Capitol Parish gym sa dalan Escario, ning dakbayan.
Sikit ang duwa sa opening period diin nagtabla ang duha ka habig, 17-all, apan naglisud ang CUBA-B pagsulod sa ilang opensa dihang ang Hoopers ni coach Norwin Honoridez mipatuman og hugot nga depensa uban ang nagtuasik nilang opensa aron makapabor og 14 puntos sa halftime, 44-30 .
Mihulga unta ang CUBA-B pinaagi sa 19-15 run ubos sa paningkamot ni 3-point artist Jess Miñoza uban sa iyang igsuon nga si JK Miñoza, apan napakyas kini pagpukan sa Hoopers.
Si Andrew Tocao maoy nangu sa Hoopers sa iyang 18 puntos samtang sila si Bogs Manulat ug Ryan Alejandre nagkumboya og 30 puntos.
Ang managsuong Miñoza Jess ug JK mao sab ang nangu sa opensa sa CUBA-B nga nagkumboya og 33 puntos. (BANATSPORTS)