CEBU, Philippines - Usa ka dakung marathon nga uloha'g "Three Sixty Pharmacy: 1st Kawasan Marathon" karong Hulyo 24 nga adto manukad sa dakung hawan sa simbahan sa Badian.
Mga long-distance runners nga dili buot modagan sa 42K full marathon, mahimong modagan sa 21K half-marathon.
Ang maong lumba gihulagway nga labing dakung running event sa amihanang bahin sa Sugbu karong tuiga. Mosubay kini sa lungsod sa Badian, Alegria ug Malabuyoc.
Sa press conference kagahapon didto sa Pino Restaurant sa Brgy. Lahug, si race director nga si Dr. Yong Larrazabal III nagkanayon nga tumong usab sa maong lumba ang pagpakita sa katahom sa talan-awon gawas sa siyudad sa Sugbu.
Magsilbe nga main attraction sa maong lumba mao ang nabantog nga tourist destination, ang Kawasan Falls sa Badian.
Gawas sa P150,000 nga giandam nga ganti sa mga mananaog, makadawat usab og pinatuyo nga medalya ang tanang finishers.
Ang registration fee nagkantidad og P900 sa 42K ug P700 sa 21K. Libre na niini ang limited edition jersey (Adidas) ug snacks.
Mahimong magparehistro diha sa Center for Sight Foundation sa Cebu Doctors' Hospital ug Nike Athletic Club sa Banilad Town Centre. (BANATSPORTS)