CEBU, Philippines - Gilampurnas sa koponang Tribu nga gipangulohan ni A. Muñez ang Panas Lower, 72- 64 sa Barangay Suba Basbas SK Summer Inter-Sitio basketball tournament didto sa ilang barangay gym sa Lapu-Lapu City.
Nagpamahit ang kainit sa Panas Lower sa sayong bahin sa duwa diin niposte kini og sayes puntos nga bentaha sa halftime, 25-31, apan ang Tribu mipabuhagay sab sa ilang mainitong opensa aron pahakan ang labaw ngadto sa kuwatro puntos, 41-45 paingon sa final period.
Takulahaw lang napapas ang labaw sa Panas Lower dihang nag-wild si Muñez uban ni R. Lobo nga parehong mi-iskor og double figures. Tungod sa ilang mga paningkamot, nailog sa Tribu ang momentum dayon pagkulit og siyete puntos nga kadaugan.
Si Muñez mirehistro og 20 puntos, samtang si Lobo mihakot og 13 puntos.
Ang pilderong Panas Lower gipangulohan ni Panis sa iyang 18 puntos, gisundan ni Manching nga adunay 13 puntos.
Sa main game, ang Poblacion yano kaayong mikulit og daog human gilubong ang Lawis, 76-60.
Si Miano, kinsa miposa og 20 puntos maoy nangu sa Poblacion, samtang si Lagdamen nga mao sab ang bugtong player nga nakakuha og double figures pinaagi sa iyang 28 puntos maoy nangu sa Lawis.
Ang liga gipasiugdahan ni Suba Basbas barangay councilor ug kanhi USJ-R Jaguar cager Luther Justiniani uban sa suporta ni SK chairman Genivive Aro.
Gipaluyohan sab kini sa Sean Luck Trading nga gipanag-iya ni Lorenzo Justiani, amahan ni Luther. (BANATSPORTS)