CCUPA, cg brokers win in sweat-less wins

CEBU, Philippines - Wala makapatulo og singot ang host club Cebu Customs United Personeros Association (CCUPA) ni president Yoly Cena sa ilang pagkulit sa ika-unom nga kadaogan pinaagi sa forfeiture batok sa walay daog nga CMM Customs Brokerage kaniadtong Sabado sa nagpadayong 1st CCUPA-CCBI basketball tournament didto sa Benajamin Solon Memorial Gym sa barangay Cogon, Ramos, ning dakbayan.

Sa sayo pa, yano sab kaayong midaog ang CG Customs Brokerage nilang team owners Roy Canillas ug Art Gonzales dihang kalit lang mikakak ug mibahag ang ikog sa Sugbopim Brokers dihang hisakpan nga kulang sila’g players ug dili tugotan nga mosulod sa second period si Cris Manulat.

Gi-undang ang duwa ug gideklara nga daog ang CG sa opisyal nga iskor, 21-14 sayo sa second period tungod kay mibalibad na ang Sugbopim sa pangagpas nga pildehon lang gihapon sila.

Malipayon kaayo ang panagway ni CG part owner Gonzales kinsa nanghinaut nga adunay milagrong mahitabo atol sa ilang pagbagat batok sa CCUPA ug MS Trucking.

Gusto pa unta ni Gonzales nga moduwa ug hataghan lang og higayon ang Sugbopim apan mibalibad si Cena aron wala nay hangyo-hangyo sa sunod duwa.

Dali kaayong mipauli si Manulat ug nag-ilis sab og dali-dali si Sugbopim skipper Roland Nacario.

Ang CG aduna nay 2-2 nga baraha ug nagkaduol na sa ilang damgo nga mo-abante sa semifinals.

Ang CCUPA migamit og barangay format nga walay ilisay sa players sa tibuok usa ka quarter.

Silang Marvin Sillar, Amay Palad, Dodong Belarmino ug Gonzales maayo untang nakaduwa niadtong higayona ug gidasonan kini sa walay hago nga kadaogan. (BANAT NEWS)