Cebu Niños hari sa Ilocos leg

CEBU, Philippines - Way nakapugong sa M. Lhuillier Kwarta Padala-Cebu Niños sa pagsakmit sa Ilocos leg sa SMC Liga Pilipinas dihang ilang gilupig ang host team Ilocos Sur CS Tigers, 68-65, didto sa Santo Domingo People’s Center.

Gibirahan dayun sa mga batos ni Niños coach Raul “Yayoy” Alcoseba ang Tigers ni Gov. Chavit Singson sa first half, dayun tukod sa 50-38 nga labaw paingun ngadto sa final period.

Hinuon, misukol ang Tigers sa fourth kuwarter human sa ilang rally sa pagpangulo ni ex-PBA Erwin Sta. Maria, Chito Jaime ug Ramsey Williams aron inaug ang labaw sa dos puntos, 65-67 sa katapusang 12 segundos sa duwa.

Human sa quick foul sa Tigers, napasulod ni Jayfor Rodriguez ang usa sa iyang duha ka free-throws aron isaka ngadto sa tres puntos ang labaw sa nahibiling tres segundos sa duwa.

May kahigayunan unta ang Tigers nga dad-on ang duwa ngadto sa overtime, apan napakyas ang go-ahead three point shot ni Sta.Maria dayun bagting sa final buzzer.

Ang kanhi UV Green Lancers nga si Rodriguez maoy leading scorer sa Niños sa iyang 12 puntos, samtang si Williams maoy nangulo sa Tigers sa iyang 12 puntos.

Sa sayu pa, gilabni usab sa MP GenSan Warriors ang ikatulong dapit dihang ilang giihaw ang Laguna Golden Lions, 83-73. (BANAT NEWS)