Van System balik no. 1 sa Power Forty Cup

CEBU, Philippines - Nasakmit pagbalik sa Van System ang unang puwesto human nila gipukan ang Park ‘N Go Bakeshop, 105-91 sa nagpadayong Power Forty Commissioner's Cup didto sa Inayawan Sports Complex.

Sa sayo pa, nakaipsot ang FC Fortune batok sa Water Market, 102-100 alang sa ilang ikatulong daog sulod sa upat ka duwa.

Ang 4-1 nga Van System gipangulohan ni Fernando Sumargo, kinsa miburak og 32 puntos, gisundan ni Celso Cabaluna nga adunay 26 puntos, samtang sila si Noel Flordeliza ug Edgar Nacario nagkumboya og 36 puntos.

Mitusak sab og 32 puntos si Michael Arias aron pangulohan ang pilderong Park ‘N Go, kinsa mihaon og 1-4 nga baraha.                                                             Sa laing bahin, si Inayawan brgy. councilor Mario Tabar mibahog og 30 puntos alang sa FC Fortune. Sila si Dodong Piezas, Melvin Caumeran, Nestor Javierto ug Teddy Ebrado mihimo sab og double figures.

Si Allan dela Rama, kinsa milansang og 26 puntos mao usab ang nangu sa Water Market nga wala pa makatilaw og daog sud sa lima ka duwa. Si Tony Ungria miamot og 20 puntos ug si Edwin Dejacto mitampo og 16 puntos.

Puntos Matag Usa

Unang duwa:

FC Fortune (102) - Tabar 30, Piezas 20, Caumeran 15, Javierto 14, Ebrado 11, Mosqueda 7, Kalinga 3, Rabadon 2

Water Market (100) - Dela Rama 26, Ungria 20, Dejacto 16, Nacional 12, Labajo 10, Dayota 8, Abellana 5, Dacalos 2, Dumale 1

Ikaduhang duwa:

Van System (105) - Sumargo 32, Cabaluna 26, Flordeliza 21, Nacario 15, Cabatas 7, Gabuya 2, Labalan 2

Park ‘N Go (91) - Arias 32, Dejarme 19, R. Rama 12, Filosopo 8, Echavez 6, Pestaño 5, G. Rama 4, Abasolo 2, Albaño 1 (BANAT NEWS)