E-League buksan na karon

CEBU, Philippines -  Suwayan sa defending champion Teletech Titans pagdaog og sunod-sunod nga korona batok sa laing 15 ka koponan sa Powerade E-League for Basketball (kanhi Inter-BPO Basketball Tournament) nga mosikad karong ala-1 sa hapon diha sa City Sports Club-Cebu basketball court sa Cebu Business Park.

Gawas sa Teletech, ang three-time champion Convergys Wolves naglaraw sab nga molangkat sa korona.

Lain pang mga koponan nga nipadayag sa ilang partisipasyon naglakip sa Stream Blue Devils, Aegis People Support Vipers, Calltek Trojans, Accenture Sharks, Eperformax Reds, Xlibris Publishers, Lexmark Stallions, Qualfon Knights ug Wipro Wild Cats.

Uban bag-ong teams nga mosalmot mao ang Support Save Dragons, JP Morgan Chase and Co. Bankers, Opinionology, Kyocera Frontiers ug Executive Boutique Tarantulas.

Ang torneyo mosubay og single round robin format diin ang top seven teams moabante sa playoffs.

Ang walo ka luna sa playoff masuta sa wild card phase.

Ang top 4 makabaton og two-to-beat advantage sa playoff. Ang semifinals ug ang finals ipaagi sa "best-of-three" series. (BANATSPORTS)