Rose chessfest gitakda

CEBU, Philippines - Kapin sa 100 ka chess players ang gilaumang maghugop sa Rose Pharmacy Chess Tournament karong Abril 30 ug Mayo 1 diha sa Elizabeth Mall Activity Center.

Mga dekalibreng chess players ang nipadayag na sa ilang partisipasyon nga gipangulohan ni International Master Kim Steven Yap, FIDE Master Anthony Makinano ug FIDE Arbiter Jobannie Tabada.

Ang torneyo mosubay og siyam ka hugnang straight Swiss System format uban ang time control nga 20 minutos matag player ug 10 seconds increment.

Ang kampiyon mobulsa og P5,000, ang second placer makadawat og P4,000 ug ang third placer makaangkon og P3,000. Ang mopahiluna sa ikaupat makaangkon og P2,000 ug ang mokapyot sa ikalima hatagan og P1,000.

Ang mopahiluna sa ikaunom hangtod sa ika-10 na dapit makadawat og P500 matag usa.

Aduna kini registration fee nga P50 alang sa Kiddies ug Ladies division, P100 alang sa mga tinun-an ug P150 alang sa open group.

Sugdan ang registration sa alas-10 sa buntag hangtod sa alas-12 sa udto karong Sabado diha sa Elizabeth Mall Activity Center. Ang mga duwa pormal nga sugdan sa ala-1 sa hapon.

Ang duha ka adlaw nga torneyo gipaluyohan sa Rose Pharmacy Inc. ug gipasiugdahan sa Cebu Chess Federation.

Alang sa dugang mga kasayoran, mahimong motawag ni Marvin Ruelan sa 09267352951 ug Roger Abella sa 09102686890.   - BANAT NEWS