CEBU, Philippines - Nabalikan sa ilang naandang duwa ang Ave Maria Sanctuary Park ug ilang gilubong ang Rose Aquarius Merchandising, 83-53 sa pagtapos sa first round sa 5th CESAFI Partners' Cup kagahapon didto sa Cebu Coliseum.
Ang Ave Maria, kinsa nitapos sa first round bitbit ang 3-3 nga baraha determinado sa ilang kadaugan ilabi sa third period diin nagpauwan sila'g mga puntos lakip na ang upat ka sunod-sunod nga triples aron moposte og makalumos nga labaw, 69-36 paghuman sa maong kuwarter.
Ang Ave Maria mikawot sa kinalawman nilang labaw nga 34 puntos, 74-30 sa basket ni Midget dela Rama.
Nakakawat sab og atensiyon si Wilkins Sanchez dihang miposa siya og tulo ka sunod-sunod nga triples sa second quarter sa kinatibuk-an niyang 11 puntos, apan si Jason Nudalo maoy nangu sa Ave Maria nga mipaksit og 13 puntos.
Ang gikilaw nga Winner Beef Loaf gipangulohan ni Lawrence Maraño, kinsa mitali og 12 puntos. Sa gihapon, ang manirahay sa Rose Aquarius nga si Fritz Dajalos napugngan ug igo lang mi-iskor og siyete puntos ug ilang gitapos ang first round uban ang 1-5 nga baraha.
PUNTOS MATAG USA
Ave Maria (83) - Nudalo 13, Sanchez 11, Abing 9, Palileo 9, Capillar 8, C. Parker 7, Olbedado 6, Senining 6, Tabaloc 6, Dela Rama 4, Lajato 2, Suliman 2
Rose Aquarius (53) - Maraño 12, Dajalos 7, E. Ferraren 6, Cabahug 4, Fuentes 4, Sedurifa 4, J. Ferraren 3, Linao 3, Misa 2, Corcilles 2, Avila 2, Genobia 2, Meca 2 - BANAT NEWS