CEBU, Philippines - Parehong nagtinguha sa pagpalambo sa ilang baraha ang Ave Maria Sanctuary Park ug ang Prime Asia Pawnshop batok sa tagsa-tagsa nila ka kaatbang atol sa pagtapos sa first round sa 5th CESAFI Partner’s Cup karong adlawa diha sa Cebu Coliseum.
Ang Ave Maria (2-3) bag-o lang nakarekober sa ilang wala damhang pagdailos human ilang gimakmak ang San Marino Corned Tuna sa miaging semana sa iskor, 92-57, apan dili gihapon sila buot mokompyansa batok sa Rose Aquarius Merchandising tungod kay inspirado kini ug taas ang moral human sa ilang impresibong kadaugan batok sa Winner Beef Loaf, 89-75 sa miaging Martes.
Sa laing duwa karon, ang Prime Asia Pawnshop tinguha sab motapos sa first round pinaagi sa maanindot nga paagi dihang ilang ikasangka ang Winner Beef Loaf nga usa sab ka team nga nagtinguha nga mo-iskor og upset. Ang Winner maoy naka-upset sa Ave Maria sa bugtong nilang daog sa maong torneyo.
Ang Ave Maria ni team owner Raffy Senining mosalig nilang Abulaiz Suliman, Jason Nudalo, Jason Olbedado ug Banjo Capillar, samtang ang Rose Aquarius mosalig nilang Fritz Dajalos, Earvin Ferraren, Randy Avila, Lawrence Maraño ug James Ferraren.
Samtang ang Prime Asia magsalig nilang Joven Cid Cortes, Michael Cantonao, Robert Gines Codilla, San Hermosa ug Giovanni Padillo.
Sila si Chester Curso, Allan Dimco, Floyd Taboada, Franklyn Batiquin ug rookie Steve Castro mao usab ang saligan sa Winner. - BANAT NEWS