CEBU, Philippines - Tuyo karon sa top seeds Salazar Colleges of Science and Institute of Technology (SIT) Skyblazers ug ang Ave Maria Sanctuary Park nga mokulit og laing daog batok sa tagsa-tagsa nilang kaatbang sa Easter Sunday presentation sa 1st M. Lhuillier Kwarta Padala-Cebu Basketball Association (MLKP-CBA) basketball tournament didto sa Cebu Coliseum.
Sa preliminary game karong hapon, ang Ave Maria ni team owner Raffy Senining laraw nga mopahamtang og laing kapildihan sa Hotel Fortuna ni team owner Lorenzo 'Chao' Sy nga ilang napilde sa una nilang panagbagat, 84-68.
Sa laing bahin, dili sab gusto ang Skyblazers nga mahitabo pa ang kulbahinam nilang kadaugan batok sa Talisay City diin naka-ipsot sila sa daginutong oras sa duwa, 78-76 atol sa first round. Ang Skyblazers wala pa gihapon makatilaw og pilde sa lima nila ka mga duwa.
Kun kompleto lang ang Hoteliers karong gabhiona, dili na masubli nga ilubong sila’g maayo sama sa nahitabo sa miaging semana nga unom lang ka players ang niduwa kay sayong mibakasyon alang sa Semana Santa.
Ang Hoteliers mosalig sa mga batan-ong players gikan sa SWU Cobras, samtang ang Ave Maria magsandig sa ilang mga beteranong players sama nilang Jercules Tangkay, Danny Aying, Alex Cainglet, Ope Abellana ug Gerry Cavan.
Ang Skyblazers ni team owner Engr. Doroteo Salazar, pangulohan sa 6-foot-8 Rino Berame uban nilang Mark Abadia, Leodi Garcia ug ex-pro Jimwell Torion.
Sa habig sa Talisay, magsalig sab sila sa ilang mga pambato nga sila si Jayford Rodriguez ug Ferdinand Lusdoc. (BANAT NEWS)