Lheo Autoshop misakmit titulo sa LLBA Rollway Cup
CEBU, Philippines - Wala kapugngi ang pagratsada sa Lheo Autoshop ni team owner Leo Almacin ug gilumsan nila ang VKK Divers ni Victor Malingin, 96-77 aron maangkon ang kampiyonato sa LLBA Rollway Cup basketball tournament didto sa Villas Magallanes gym sa Lapu-Lapu City.
Sikit pa kaayong nagtakus ang duha sa pagsugod diin nagligas lang kini og dos puntos paghuman sa unang kuwarter, 24-22 pabor sa Lheo Autoshop.
Sa kombinasyon nilang Rene Cuadra ug Ryan Villomo, ang Lheo Autoshop padayong mikalingaw og patuasik sa ilang opensa hangtod nga milawom pag-ayo ang lubong ngadto na sa 15 puntos, 76-61 paingon sa final period.
Si Cuadra maoy nangu sa Lheo Autoshop sa iyang 23 puntos nga igo na kaayo alang kaniya nga ilhong MVP, samtang si Villomo mikambiya og 22 puntos.
Laing tulo nila ka teammates ang mikimada og double figures. Si Arman Lamoste mitikdol og 21 puntos, si Francisco adunay 12 puntos ug si Noli Paquibot mihirit og 10 puntos.
Bugtong si Bulldog Ybañez lang nikulit og double figures sa iyang 28 puntos alang sa VKK Divers.
Sa pasiunang duwa, ang LLBA mipukan sa Dental, 113-105 sa ilang exhibiton game.
Si Leo Bascon mibagdok og 42 puntos aron pangulohan ang LLBA, samtang si Ryan Ceniza mao sab ang nangu sa pilderong Dental pinaagi sa iyang 32 puntos.
Ang torneyo nahimong posible tungod sa pagpaluyo sa Rollway Customs Brokerage ni Rolly dela Pieza ug JB Sportswear.
PUNTOS MATAG USA
Unang duwa
LLBA (113) - Bascon 42, Tariman 22, Ngujo 10, Yu 9, Tampus 6, Manilag 4, Igot 4, Casinillo 4
DENTAL (105) - Ceniza 32, Benitez 26, Ouano 14, Igot 12, Suico 9, Munar 5, Dela Peña 2, Anthony 2, Natavio 2
Ikaduhang duwa:
LHEO AUTOSHOP (98) - Cuadra 23, Villomo 22, Lamoste 21, Francisco 12, Paquibot 10, Asuncion 4, Cosep 2, Arong 2
VKK DIVERS (77) - Ybañez 28, Aying 9, Lapoja 8, Lucas 8, Macasahol 7, Manlangit 7, Dignos 4, Pangatungan 4, Leopats 2 (BANAT NEWS)
- Latest
- Trending
