CEBU, Philippines - Gipakita sa Atlanta Hawks ang ilang pagdominar sa Orlando Magic karong tuiga dili lang mahitabo sa regular-season apan hasta sab sa postseason dihang ilang gipakuratan ang Magic didto sa ilang homecourt pinaagi sa pag-iskor og 103-93 nga kadaogan didto sa Amway Arena sa Orlando, Florida.
Mibahug og 25 puntos si Jise Johnson samtang midugang ug 23 puntos si Jamal Crawford alang sa Hawks aron pakgangon ang pagmangtas ni Dwight Howard kinsa mitabla sa iyang career-high nga 46 puntos.
Ang Atlanta gitagak sa Orlando sa playoffs sa miaging tuig pinaagi sa usa sa labing dakong four-game sweep sa kasaysayan sa NBA apan lain ang hulagway karong tuiga tungod kay ang Hawks mao kanunay ang nag-una ug naglabaw pa gani sila’g 18 puntos dihang si Howard lang ang mibahug og maayo apan wala makahuygo ang iyang mga kauban.
“It’s a seven-game series and anything can happen.All I wanted us to come in here and do is play hard and maintain our composure. … I could tell our guys were ready for tonight’s game,” matod pa sa coach sa Hawks nga si Larry Drew.
Gawas sa iyang 46 puntos, si Howard milangkat sab og 19 ka rebounds ug si Jameer Nelson miburak og 27 puntos apan wala nay laing player sa Orlando nga nakahimo’g double figures.
Lima ka players sa Hawks ang miamot ug labing menos 13 puntos aron mokulit sa ilang ika-upat nga daog batok sa Magic ug miputol sab sa ilang nagkutay nga unom ka sagunson nga kapildehan sa naghinapos nga bahin sa regular season.
Sila si Al Horford ug ug Jos Smith midugang og 16 og 15 puntos alang sa Hawks samtang si Kirk Hinrich miamot og 13 puntos.
Suwayan sa Hawks pagkulit og 2-0 nga baraha atol sa Game 2 sa ilang best-of-seven karong Miyerkules didto gihapon sa nataran sa Magic.
Sa laing duwa, mibahug og 39 puntos si Derrick Rose aron pangulohan ang topseed nga Chicago Bulls ngadto sa 104-99 nga kadaogan batok sa no. 8 seed nga Indiana Pacers didto sa United Center sa Chicago, Illinois.
Midaog sab ang no. 2 nga Miami Heat batok sa no. 7 nga Philadelphia Sixers sa iskor, 97-89.
Sa bugtong Western Conference match-up, naka-ipsot ang no. 3 Dallas Mavericks batok sa no. 6 Portland Trail Blazers, 89-81.
Magduwa karong adlawa ang no. 1 sa West ang San Antonio Spyrs batok sa no. 8 Memphis Grizzlies, no. 2 LA Lakers batok sa no. 7 New Orleans Hornets ug no. 4 Oklahoma City Thunder batok sa no. 5 Denver Nuggets.
Ang no. 3 sa East nga Boston Celtics makigsangka sab karon batok sa no. 6 New York Knicks. (GGM gikan sa NBA.com)