ACT, Hotel Fortuna mag-abot pag-usab

CEBU, Philippines -  Nagtakilid nga teams Asian College of Technology (ACT) Cyber Knights ug Hotel Fortuna magtakus na sab sa pagsugod sa ikaduhang hugna sa eliminasyon sa 1st M. Lhuillier Kwarta Padala-Cebu Basketball Association (MLKP-CBA) basketball tournament karong adlawa diha sa Cebu Coliseum.

Atol sa ilang unang engkuwentro niadtong Pebrero 27, ang Cyber Knights mikayod pa og maayo una nila maangkon ang 78-67 nga kadaugan batok sa Hotel Fortuna.

Sa ilang sangka karon, ang Cyber Knights tinguha nga mo-iskor pag-usab, samtang ang Hotel Fortuna naglungot-lungot sab nga mobawos.

Mangulo sa Cyber Knights mao ang mga beteranong si Alano Caputolan, Ronaldo Bucao, Milfred Sampelo, Abe Galinato, Bernie Ursal ug John Villaver, samtang ang Hotel Fortuna maghangad sa abilidad nilang Aard Evan Diango, Clefford Maguate, Chris Litorja, Ritchie Jalandoni, Jeffrey Pria ug Vernini Tangarorang.

Sa pasiunang duwa, ang Ave Maria Sanctuary Park tuyo nga magbinugtong sa ikaduhang dapit sa dihang ilang sangkaon ang Mandaue-Cebu Landmasters nga ilang napilde, 88-81 sa una nilang panagsangka.

Ang Ave Maria magsandig nilang Jercules Tangkay, Danny Aying, Alex Cainglet, Ope Abellana, Gerry Cavan ug Enrico Llanto, samtang ang Landmasters naglaum sa maayong performance sa ilang sinaligan ilabi ni Reggie Licanda, Kelvin Juliane, Franklin Nailon, Joever Samote, Frangel Omolon, Elvis Labares ug Jerwin Espina. (BANATSPORTS)