Prime Asia vs. Gaisano Capital

CEBU, Philippines - Ang Gaisano Capital bag-o lang milubong sa San Marino Corned Tuna, 80-65 alang sa ilang ikalimang sagunson nga daog niadtong Huwebes ug ila karong ikabagat ang Prime Asia Pawnshop, kinsa naghupot og 2-2 nga baraha ug ang ilang posibleng kadaugan maoy maghatag kanila’g first round sweep.

Sa laing bahin, ang Lion Tiger, kinsa mipukan sa Ave Maria Sanctuary Park sa miaging gabii, 78-65, makigsangka batok sa wala pay daog nga Rose Aquarius Merchandising ug ang nagsangki-ig nga San Marino makigtakos batok sa Winner Beef Loaf.

Upset lang ang purohan sa Prime Asia batok sa Gaisano Capital ug dakung isda ang ilang makubit kun molampos sila.

Niadtong Huwebes, si PBA coach Bo Perasol sa Powerade nisaksi sa Gaisano-San Marino game ug iyang gi-obserbahan ang lihok ni 6-foot-9 Junemar Fajardo.

Si Fajardo maoy nangu sa Gaisano Capital sa iyang 13 puntos, samtang si Glenn Magallanes midugang og 12 puntos.

Miamot sab og double figures si Edward Pao nga adunay 10 puntos. Ang Gaisano naglabaw og 23 puntos sa fourth period, 73-50, apan nakibhangan kini'g gamay human sa rally sa San Marino.

Si Bonifacio Guillena Jr. maoy nangu sa 1-3 nga San Marino sa iyang 15 puntos samtang sila si Joseph Nalos ug Jhonard Pineda midugang og 11 ug 10 puntos matag usa.

Sa laing bahin, si Jerome Silva maoy nangu sa Lion Tiger sa iyang 19 puntos ug sila si Andrew Avellanoza ug John Michael Abad nagkumboya og 22 puntos.

Bugtong si Midget dela Rama lang maoy mi-iskor og double figures alang sa 1-3 nga Ave Maria sa iyang 13 puntos. (BANATSPORTS)