Violet team kampiyon na
CEBU, Philippines - Nimugna og tournament-high 50 puntos si Ondo Casquejo alang sa Violet team nga milubong sa karibal nga Yellow team 128-115 ug aron usab masakmit ang korona sa Phase 3 Camella Homes Sunday Club basketball tournament didto sa Villas Magallanes gym sa Lapu-Lapu City.
Human sa 31-29 nga labaw sa first period, ang Violet sa pagpangulo ni Casquejo miarangkada sa sunod nga duha ka kuwarter ug giinat og maayo ang ilang bentaha ngadto na sa 21 puntos paghuman sa third quarter, 101-80.
Bugtong konsolasyon sa naghangak nga Yellow mao ang pagkitkit sa labaw ngadto sa 13 puntos.
Si Centes Brañanola miligwat og 22 puntos ug si Rolly dela Pieza miugkat og 18 puntos alang sa nakampiyon nga Violet team.
Ang Yellow gipangulohan ni Jun Geraldez, kinsa mibagdok og 27 puntos, gisundan ni Rufino Ragaza sa iyang 22 puntos, Alex Balberona nga adunay 20 puntos ug Amay Palad nga nisansan og 17 puntos. (BANATSPORTS)
- Latest
- Trending
