CEBU, Philippines - Ang DanceSports Team Cebu City (DTCC) uban sa Department of Education Region VII mopahigayon na usab og libreng dancesports summer clinic ning panahon sa bakasyon.
Sugdan kini karong adlawa ug matapos sa Mayo 11. Himuon kini sa matag adlaw'ng Lunes, Martes ug Biyernes.
Kabahin kini sa programa sa DTCC sa paghatag og libreng community programs ngadto sa mga kabataan sa nagkadaiyang barangay sa siyudad sa Sugbu.
Gawas sa pagbaid sa ilang abilidad, usa usab kini nga paagi aron malayo ang kabataan gikan sa dautang bisyo.
Niadtong mga interesado sa maong clinic, mahimong mobisita sa ilang mga gyms o sa sports complex.
Ang mga barangay nga mopahigayon og dancesports clinic naglakip sa Brgy. Apas, Mambaling, Agsungot, Hipodromo, Sawang Calero, Inayawan, Lahug, San Nicolas, Mabolo, Banilad, Labangon, Guadalupe, Tejero, Bulacao Community, Tisa I, Tisa II, Basak, Zapatera ug Talamban.
Aduna usab clinic nga ilusad sa Florencio Urot High School, Don Sergio Elementary and High School ug Cebu City National Science High School.
Alang sa dugang pangutana kabahin sa schedule sa summer clinic sa inyong mga barangay, mahimong mobisita sa DTCC Studio diha sa Cebu City Sports Center o tawag sa numero 415-5844. - BANAT NEWS