Winner Beef Loaf mi-iskor og daog

CEBU, Philippines - Gibarugan sa underdog ang ilang ngalan isip Winner Beef Loaf-CIT Wildcats dihang ilang gipakuratan ang Ave Maria Sanctuary Park-USJR Jaguars, 81-74, samtang ang Lion Tiger-UV yano kaayong midemolis sa Prime Asia-USC, 75-49 sa 5th CESAFI Partner’s Cup niadtong Huwebes sa gabii didto sa Cebu Coliseum.

Gumikan niini, nagtabla na sa kasamtangan sa unang puwesto ang Lion Tiger ug ang Gaisano Capital-UC sa managsama nilang 2-0 nga baraha.

Daghan ang maayong nakaduwa   sa Winnner nga mikulit sa una nilang daog sud sa duha ka duwa, apan ang mas misidlak og maayo niadtong gabhiona   sila si Chester Curso ug Allan Dimco.

Si Curso maoy topscorer uban ang iyang 20 puntos, samtang si Dimco, kinsa maoy   nagpasiugda sa mainitong rally pagsugod sa third quarter midugang og 11 puntos uban nilang Floyd Taboada ug rookie Steve Castro.

Ang Winner maoy nabiyaan sa halftime, 24-31, apan hinay-hinay kini nilang gipapas ug nakahimo paglabaw og siyete puntos, 55-48 sa nahabiling sayes minutos sa third quarter. Nailog sa makadiyot sa Ave Maria ang labaw sa tunga-tungang bahin sa final period, hinuon, nabakwi sab dayon sa Winner ang labaw pinaagi sa perimeter jumper ni Castro, 59-57.

 Si Banjo Capillar mao lang ang bugtong player nga nikulit og double figures alang sa Ave Maria   pinaagi sa iyang 12 puntos.

Sa laing bahin, maayo kaayong pagkabahin ang opensa sa Lion Tiger ug human magtabla, 27-all, nagpabuhagay dayon kini og mga puntos. Ang Lion Tiger nilabaw og labing menos 23 puntos.

Sila si Phil Mercader ug Niño Saycon maoy nangu sa Lion Tiger sa ilang 11 ug 10 puntos matag usa.

Milampos sab ang Lion Tiger pagpugong sa top gunners sa Prime Asia nga sila si Michael Cantonao ug Giovanni Padillo.

 Walay bisan usa ka player ang mi-iskor og double figures alang sa Prime Asia nga nakatilaw sa ilang ikaduhang sunod-sunod nga pilde. (BANATSPORTS)