CEBU, Philippines - Nakaipsot ang Lheo Autoshop ug VKK Divers batok sa tagsa-tagsa nilang karibal sa Game-3 semifinals series ug nakuha nila ang katungod aron mag-ilog sa kampiyonato sa LLBA Rollway Cup basketball tournament niadtong Biyernes sa gabii didto sa Villas Magallanes gym, Lapu-Lapu City.
Ang Lheo Autoshop mitagak sa Rollway Customs Brokerage, 76-74, samtang ang VKK Divers mitaktak sa JJTS, 60-59.
Ang Lheo Autoshop ni team manager Leo Almacin ug VKK Divers ni Victor Malingin mag-ilog sa titulo pinasikad sa "best-of-three" series, samtang ang Rollway ni Rolly dela Pieza ug JJTS ni Roger Ompad magtaktakay alang sa ikatulong dapit.
Determinado ang Lheo nga moangkon og lingkoranan sa finals dihang ila dayon nga gilubong ang Rollway og 12 puntos sa unang kuwarter, 17-5 ug mitubo pa kini ngadto sa 16 puntos sa halftime, 32-16.
Napahakan hinuon ang labaw ngadto na lang sa otso puntos dihang mi-rally ang Rollway sa third period, 45-53, apan nakarekober ang Lheo pinaagi sa walay kukaluya nga paningkamot nilang Rene Cuadra ug Ryan Villomo nga maoy nangulo sa kadaugan.
Nagtabla ang iskor, 74-all sa daginutong segundos ug pabor unta nga modaog ang Rollway dihang ila ang ball position, apan sa tantong paniguro nakahimo kini'g turnover ug nailog ni Sam Asuncion ang bola ug dayon gipasa ngadto ni Cuadra, kinsa maoy bayani sa maong duwa.
Sila si Cuadra ug Villomo parehong mihabwa og 18 puntos, samtang si Asuncion miigo lang og singko puntos. Miposte sab og double figures sila Noli Paquibot ug Arman Lamoste.
Ang Rollway gipangulohan ni Uriel Manilag pinaagi sa iyang 17 puntos, gisundan ni Dondon Sevilla nga adunay 13, sila si Jiji Daño ug Waylmer Rosal mitampo sab og double figures.
Sa laing duwa, si Mark Lucas mihabwa og 12 puntos aron pangulohan ang VKK Divers, samtang sila si Buldog Ybañez ug Sammy Lapoja miariya og 11 puntos matag usa alang sa maong kadaugan.
Ang natagak nga JJTS gipangulohan ni Roland Cordero, kinsa misansan og 12 puntos, gisundan nilang John Taghoy ug Rukawa nga adunay 10 puntos matag usa.
PUNTOS MATAG USA
Unang duwa:
VKK (60) - Lucas 12, Lapoja 11, Ybañez 11, Dignos 9, Aying 7, Pangatungan 6, Nakasahol 2, Malingin 2
JJTS (59) - Cordero 12, Taghoy 10, Rukawa 10, Bancale 7, Versoza 5, Ompad 4, Tsardago 4, Gutib 4, Adlit 3
Ikaduhang duwa:
LHEO (76) - Cuadra 18, Villomo 18, Paquibot 12, Lamoste 10, Asuncion 5, Arong 5, Cosep 4, Francisco 2, Igot 2
ROLLWAY (74) - Manilag 17, Sevilla 13, Daño 12, Rosal 10, Centes 9, Bentazal 6, Palad 6, Aparre 1 - BANAT NEWS