Binuk-anay'g baraha sa CBA caging

CEBU, Philippines - Puno sa aksiyon ang masaksihan sa local basketball fans karong gabii sa dihang ang walay pildeng mga koponan Salazar College of Science and Institute of Technology (SCSIT) Skyblazers ug Ave Maria Sanctuary Park ang magsangka alang sa solong liderato sa 1st M. Lhuillier Kwarta Padala-Cebu Basketball Association (MLKP-CBA) basketball tournament diha sa USC gym.

Sa pasiunang duwa, ang Talisay City mosukod sa abilidad sa Asian College of Technology (ACT) Cyber Knights diin magbinuk-anay sab kini sa ilang 1-2 win-loss records.

Ang Skyblazers nga usa karon ka legitimate contender magsalig sa ilang 6-foot-8 center Rino Berame sa front line. Maghangad sab sila sa beteranong Mark Abadia ug ex-pro Jimwell Torion.

Ang Ave Maria magsandig sa ragtag line-up nga gilangkuban sa ex-pros Jercules Tangkay ug Danny Aying, uban sa laing hinog nga players sama ni Alex Cainglet, Aldrin Ocañada, Jerry Cavan, Ope Abellana ug Enrico Llanto. Suportahan sab sila sa laing USJ-R players nga naglakip ni Kurt Amores, Jabe Delfino ug Armand Ponce.

Sa laing bahin, ang Cyber Knights ni coach Titing Manalili magsalig nilang Alano Caputolan, Bernie Ursal, Ronaldo Bucao, Abe Galinato, Michael Luga, Morsie Akad ug Milfred Sampelo ug uban pa.

Ang Talisay City nga mihimo'g dakung upset batok sa laing huyang nga koponan Hotel Fortuna sa miaging semana, pangulohan sa ilang shooter Jayford Rodriguez. (BANATSPORTS)