JJTS, Lheo Autoshop buhi pa
CEBU, Philippines - Nakaginhawa pa ang JJTS ni team owner Roger Ompad ug Lheo Autoshop ni Leo Almacin human makarekober sa Game-2 sa ilang best-of-three semifinal series sa LLBA Rollway Cup basketball tournament sa miaging gabii didto sa Villas Magallanes gym, Lapu-Lapu City.
Ang JJTS nga maoy nikontrolar sa duwa milubong sa VKK Divers ni Victor Malingin, 79-65 ug ang Lheo Autoshop midismantol sa Rollway Customs Brokerage ni team owner Rolly dela Pieza sa iskor nga 99-85.
Magtiwas karon ang upat ka koponan alang sa tinaktakay nga Game-3 diin ang mga modaog maoy mag-abot sa "best-of-three" finals nga sugdan karong Lunes.
Ang mga naparot nga koponan magtinaktakay alang sa ikatulong dapit.
Si Kakay Verzosa milansang og 19 puntos aron pangulohan ang JJTS, gisundan nilang Mario Bancale ug John Taghoy nga miabuno og 12 ug 11 puntos matag usa.
Ang gilumsan nga VKK Divers gipangulohan sab ni Bulldog Ybañez nga mitira og 21 puntos. Sila si Sammy Lapoja ug Mark Lucas nagkumboya og 21 puntos.
Sa laing bahin si Noli Paquibot maoy topscorer sa Lheo Autoshop nga mihagpat og 22 puntos. Laing lima ka players sa Lheo ang miariya og double figures alang sa maong kadaugan.
Nangu sa naabiriya nga Rollway mao sila si Dondon Sevilla ug Uriel Manilag nga nagkumboya og 39 puntos, samtang si Centes Brañanola mitikdol og 16 puntos. (BANATSPORTS)
- Latest
- Trending
