CEBU, Philippines - Sangkaon karon sa Asian College of Technology (ACT) Cyber Knights ang walay daog-daog nga Mandaue-Cebu Landmasters uban ang paglaum nga mag-solo sa ikaduhang dapit sa 1st M. Lhuillier Kwarta Padala-Cebu Basketball Association (MLKP-CBA) season diha sa USC-main gym.
Sa laing duwa, suwayan sab sa Hotel Fortuna pagkulit og laing daog dihang ilang harungon ang Talisay City nga wala pa sab makadaog sud sa ilang duha ka duwa.
Ang Cyber Knights (1-1) ni coach Titing Manalili mosandig nilang Alano Caputolan, Bernie Ursal, Ronaldo Bucao, Michael Luga ug Abe Galinato, samtang ang Landmasters ni coach Roel Gomez magsalig sa abilidad sa beteranong si Reggie Licanda, top center Franklin Nailon, Frangel Omolon ug Joever Samonte nga maoy pipila sa iyang mga sinaligan.
Sa laing bahin, ang 1-2 nga Hotel Fortuna kinahanglan nang modaog aron makarekober batok sa 0-2 nga Talisay City.
Ang Hotel Fortuna ni coach Pablo Yu moparada sa mga batan-ong players gikan sa SWU Cobras nga gipangulohan ni Aard Evan Diango, Chris Litorja, Jeffrey Pria, Clefford Maguate ug Ritchie Jalandoni ug ingon man usab ni Vernini Tangarorang ug Mark Manigque.
Ang Talisay mosalig sa ilang leading scorer nga si Jayford Rodriguez apan kinahanglan sab siya’g suporta sa uban niyang teammates. (BANAT)