CEBU, Philippines - Mokabat ngadto sa P150,000 ang ganting salapi ang giandam alang sa 3rd Great Lapu-Lapu Run nga gikatakda karong Abril 17 didto sa Lapu-Lapu City.
Gawas pa niini, ang top Filipino male ug female runners sa 21K category makakuha og tiket alang sa Singapore Marathon sa nanghinapos nga bahin ning tuiga.
Ang organizers misaad og mas nindot ug mabulokon nga lumba itandi sa nangaging duha ka lumba.
Ning tuiga, ang organizers mikuha sa Sports and Fitness Enthusiasts (SAFE) nga gipangulohan ni Joel Baring nga modala sa technical side sa lumba uban ni John Pages ug Mayrick Jacalan's Sprinttimer alang sa time chip.
Usa ka bag-ong rota ang ipasubay diin moagi kini sa ubos sa Marcelo Fernan bridge ug ingon man ang bahin sa Mactan International Airport.
Ang kalihukan kabahin pagpangandam sa kagamhanan sa dakbayan sa Lapu-Lapu alang sa Tri 113 karong Disyembre.
Ang Tri 113 usa ka international triathlon competition nga nalambigit sa swimming, biking ug running.
Pinaagi sa Great Lapu-Lapu Run, si councilor Harry Radaza naglaum nga ang runners makig-timbang uban sa cyclists ug swimmers aron mohulma og relay team alang sa Tri 113.
Gawas sa dagan, aduna say ipahigayong Olango Challenge, usa ka open water race sunod bulan ug cycling competition.
Ang registration sa lumba sa dagan sugdan karong Lunes ug matapos hangtod sa Abril 15 diha sa Lapu-Lapu City Tourism Cultural and Historical Affairs Commission ug sa Runnr sa Ayala Center-Cebu.
Aduna kini registration fee nga P250 alang sa 5K ug 10K runners ug P450 alang sa 21K. - BANAT NEWS