Sagupa squad kampiyon sa 2nd Governor Gwen Garcia Airsoft Open

CEBU, Philippines - Gilupig sa Sagupa squad ang defending champion Crack Legion aron maghari sa 2nd Governor Gwen Garcia Airsoft Open niadtong miaging adlaw didto sa north reclamation area.

Human mihari sa fourth leg didto sa Borbon, ang Sagupa sa pagpangulo sa ilang team captain Clark Nebril, padayon og pamupo og daog aron palagputon ang unang kampiyon Crack Legion ngadto sa ikaduhang dapit uban sa Guadalupe Airsoft Team (GAT).

Ang SAAT squad sa Talamban mipahiluna sa ikatulo nga dapit.

Gawas sa nahisgutang mga koponan, lain pang mga entrante mao ang ML Boa, Sandugo Airsoft Warriors sa Bohol, Argao Team Airsoft, Badian Airsoft Team, ASB Commando, West Rasmussen Team sa Badian, MI-43 Iskalawag sa Minglanilla, Overknights sa Opon, Lapu-Lapu City, Pacman of Mactan, Talamban Airsoft Team, Mandirigma sa Mandaue City ug Bohol Beach Boys.

Ang Sagupa squad nakadawat og customized trophy   isip kampiyon.

Si tournament chairman Deo Cerna sa Airsoft Group, mipadayag nga ang 120 ka duwa hapsay nga napahigayon bisan og lapukon ang binyu tungod sa pag-ulan-ulan.

"So far, maayo ra gyud ang dagan sa tournament despite nga lapukon gyud ang venue tungod sa ulan but nahuman gyud namu yesterday. So far, wala say reklamo regarding sa results so everything ended well," saysay ni Cerna. - BANAT NEWS