Pagara mobida sa Pinoy Pride 5

CEBU, Philippines - Mag-atubang na sab og laing hagit ang batan-ong light welterweight fighter Jason Pagara nga modepensa sa iyang WBO Youth AsPac welterweight title batok ni Tanzanian Deo Njiku sa "Pinoy Pride 5: Battle of Champions" karong Abril 9 didto sa St. La Salle Coliseum sa Bacolod City.

Maninguha si Pagara nga mo-iskor og impresibong kadaugan aron ipakita nga angayan na siya alang sa mga dagkung away.

Si Pagara, 18-anyos giplanohang ipadala sa ALA Promotions ngadto sa Estados Unidos diin adto bairon ang iyang abilidad sama sa iyang stablemate nga si Mark Jason Melligen.

Apan sa dili pa mahitabo, kinahanglan una nga ipakita ni Pagara nga angayan siya sa maong tanyag pinaagi sa pagpakita sa iyang maayong performance.

 Ang Pagara-Njiku showdown maoy supporting bout sa away ni WBO minimumweight champion Donnie 'Ahas' Nietes, kinsa mopakita sa una niyang labok ubos sa light flyweight batok sa Mehikanong si Armando Vasquez.

Mokompleto sa undercard mao ang sangka sa laing ALA fighter Roli Gasca batok ni Thai Ngaotawan Sithsaithong sa Thailand, si Lorenzo Villanueva manalipod sa iyang WBO Oriental featherweight title ni Ramadhani Shauro sa Africa.

Mosaka usab sa ring ang hometown idol sa Bacolod nga si Arthur Villanueva batok ni Mark Anthony Geraldo sa Cagayan De Oro.   - BANAT NEWS